الاثنين، 27 يونيو 2011

كنتوا كدابين ولا بقيتو كدابين

علشان لما نقول دايما ربنا محافظ على البلد اللي اسمها مصر دي تبقو تصدقونا ... ممكن واحد يطلع  كل يوم وكل ساعه ويتكلم كلام زي الفل ويقول انه هيخلي مصر دي ام الدنيا ومرات ابوها كمان  وهوبا إذ فجأة تلاقيه مرة واحده وفي ظرف خمس ثواني قال جملة او عمل موقف زي الدبش يهد كل اللي بناه ويبينه على حقيقته ويعريه ويخليه ملط كمان .... خد عندك

*************************************



1-  واحد زي عمرو حمزاوي .. يمكن اكتر واحد شد الشباب لانه شاب وكلامه محترم وهوبا فوق فوق فوق لدرجة ان الكل كان مستني يشوف الحزب بتاعه ومنتظر انه هيكون حزب وداد قلبي .. أوم ايه نلاقيه طالع يقول المسلمة تتجوز مسيحي ... ماااااشي اعتذرت وسامحناك يا عمور ولو ان اللي في القلب في القلب .. قوم يطلع تاني يقولك ان الدستور اولا دي دعوة ضد الديموقراطية والمهلبية وارداة الشعب المية المية .. الله  ... يا واد ده انت كنت عامل اعلان عشان نقول لا .. وانا وانت والحبايب عارفين كويس النتيجة طلعت نعم ليه وازاي .. ايه اللي اتغير يعني دلوقتي .. اقولك انا ... اللي اتغير ان الحزب لسه نونو النونو كوانونو وعايز تلم نفسك وتلايمها لحد ما يقوم الحزب وبعدها يحلها الحلال ... يعني من الاخر مصلحتك اولا .. سوري يا عمورة .. اشوفك الثورة الجاية ان شاء الله  .

*************************************



2- اونكل نجيب سويرس المتكلم المحترم المحايد اللي مش متطرف العقلاني اللي عمل حزب وسماه المصريين الاحرار .. هوبا طاخ إذ فجأة مقدرش يمسك نفسه يا عيني الظاهر كان عنده اسهال صور وحط صورة ميكي ماوس وهو ملتحي وصورة ميكي ماوساية وهي منتقبه .. يعني من الاخر بيشبه المنتقبة والملتحي بالفيران .. وبعدين طلع يقول اوه نو مونديو سوري يا ولاد انا كنت بهزر ..اهييييييييييييه ... طيب حيث كده بقا بتوع اطفيح كانوا بيهزروا وبتوع امبابة كانوا بيهزروا والشيخ انس اللي كان عايز يولع في كنايس امبابة كلها كان بيهزر .. على العموم خلاص يا عمو نجيب مفيش مشكلة ما كلنا بنهزر يا اخي جت عليك .. بس مطلوب منك حاجه واحده بس .. انك تغير اسم الحزب بتاعك بدل ما هو المصريين الاحرار .. خليه ميكي ماوس الحر .. او ممكن تخليه المصريين بيهزروا واحنا معاهم .

*************************************



3- الاخوة الغاليين المسكريين اللي بيقولوا على نفسهم اسلاميين .. في الاول  شوية قالوا الخروج على الحاكم حرام .. بعد شوية .. الثورة حرام بس مش اوي يعني ممكن تكون مباحة .. وبعد شويتين الديمواقراطية حرام لانها وحشة ومينفعش الشعب يحكم نفسه .. وبعد شويتين تانيين غير الاولانيين الديموقراطية مش حرام اوي .. هي حلال لو احنا هنحكمكوا لاننا عارفين مصلحتكم  ... وهوبا إذ فجأة نلاقي الشيخ الجميل حازم صلاح ابو اسماعيل مرشح نفسه .. وبصرف النظر اني بجد كنت احب ان رئيس دولتي يكون اسمه حازم .. لكن مش دي المشكلة ... المشكلة والصدمة انه طلع بتصريح سقع النهاردة وموجود على موقع مصراوي .. بيقولك ايه بقا .. بيقول انا ليبرالي جدا ... يوووووووووووووووووه والله العظيم لغبطتونا ونسيتونا معاني الكلمتين اللي كنا ما صدقنا عرفنا معناهم ايه .. طيب يا سيدي طالما انت طلعت ليبرالي اخر حاجه .. ايه رأيك بقا ان انا عايزها اسلامية اخر حاجه ومش هرشحك .... مع تحيات منطق ( حاوريني يا كيكا ) .

*************************************



4-  الاخوان المسلمين دول بقا خلاص زهقت من الكلام عنهم لكن لفت نظري كلمتين كده قالهم عمنا عصام سلطان .. انهم لسه لحد النهاردة مفيش ترخيص ولا شكل قانوني للجماعة ... طب الاول كان النظام الفاسد بيحول دون صدور الترخيص .. دلوقتي بقا مين اللي بيحول .. البيض الفاسد مثلا ... القصة بإختصار انكوا غير انكو مكشوفين وبجحين ومنافقين في السر والعلانية .. برررررررررررضه ربننا كشفك نيتكم بالحكاية دي .. طب ازاي .. اقولك انا يا برنس .. البشوات واضح جدا انهم لما بيبقوا اكثرية وليهم ارضية قوية مبيهتموش خالص بحكاية القانون والكلام السيس ده .. بدليل انهم دلوقتي معتمدين على ان الجماعه موجوده من ايام الابيض واسود وليها كيان عملاق ومش هاين عليهم يخلصوا تصريح صغنن اد كده .. امل لما تبقوا اغلبية في مجلس الشعب هتعملوا ايه فينا ... لما تبقوا انتو اللي بتحطوا القوانين هتهببوا ايه فينا .. ارحمونا بقا .

*************************************



5- محمد سليم العوا ... كان الله في عونه .. في وقت من الاوقات كان الراجل ده عنده 12 مكتب ولا مدري ابصر ايه شركة .. ومش لاقي وقت يديرهم ... لكن يبدوا انه ولله الحمد لقى واحد ابن حلال يديرله ال12 شركة دول وبناء عليه فقد تفضل سيادته ووافق على انه يرشح نفسه للرياسه .... ماااااااااااااااااشي  ميجراش حاجه .. بس اللي نفسي اعرفه ازاي تكون حضرتك امن اهم واكبر العوامل الحفازة في قصة كاميليا شحاته اول ما طلعت لما قلت ان الكنايس فيها سلاح .. وتيجي دلوقتي تقول انك بتحب المسيحين وانك برررررررررضه مش اسلامي متشدد ومدني روش .. وتنكر اللي قلته قبل كده ...!

الخميس، 16 يونيو 2011

المجلس العسكري ... لماذا ؟

أسئلة تنتظر الأجوبة .. ومن يدري قد تجد هذه الاجابات سريعا وقد تجدها بعد 30 عام ..

1- عدم إستدعاء عمر سليمان لاي تحقيق .. هل يعني ضمنيا انه طاهر ونقي وناصع البياض ولم يخطئ او يستفيد من منصبه ؟

2- لماذا يتم استدعاء من ينتقد المجلس العسكري للنيابة العسكرية .. في الوقت الذي لا يتم التعرض لمن يسب الثورة ويسخر منها .. على الرغم من انه يفترض ان المجلس العسكري اعترف بالثورة ويحميها كما يدعي ؟

3- لماذا تم التعامل مع المدنيين باسلوب العنف والتعذيب في اكثر من موقف (  كشف العذرية - فض اعتصامات التحرير - حالات التعذيب من قبل الشرطة العسكرية ) .. ما الرسالة التي يجب ان نفهمها ؟

4- لماذا تم ترك فلول النظام لاكثر من شهرين لتدبير امورهم ولم يتم استدعائهم مباشرة بعد الثورة .. خصوصا انهم اقرب المقربين من المطبخ الرئاسي ( سرور - الشريف - عزمي ) ؟

5- لماذا يبقى المجلس العسكري على بعض الوزراء من بقايا النظام الفاسد ... حتى ولو فرض ان رئيس الوزراء هو من اختارهم بشخصه وصفته .. لماذا لا يتدخل المجلس لحماية الثورة ؟

6- لماذا يتهاون المجلس العسكري مع المتخاذلين من الوزراء كالعيسوي وزير الداخلية ولا يضغط عليه رغم ظهور تجاوازت موثقة ووجود شهود عليها ... ويتخلى بسهولة عن رجل استطاع في خلال شهرين ان يوثق نفسه تاريخيا كأفضل وزير خارجية في تاريخ مصر ليذهب الى منصب مهمش عقيم ؟

7- ان كان اعضاء المجلس العسكري قد اقسموا على حماية مصالح وأمن هذا الوطن أرضا وشعبا .. فكيف يحدث ان يخلو ميدان التحرير الذي يملؤه المصريين ايا كان انتمائهم السياسي من الحماية الامنية في نفس الوقت الذي يتمتع فيه حسني مبارك المخلوع بأعلى درجات الحماية والتأمين ؟ ... حدث في مصر في احد الايام ان الجيش لا يحمي الشعب ويحمي حسني مبارك بعد الثورة ... ومهما كانت الحجه ومهما كان الدهاء السياسي فلا يوجد عذر واحد حقيقي وصادق لهذا التصرف الغريب والمريب ؟

8- هل هي صدفة بحته ان يجتمع الاخوان المسلمون بعمر سليمان ومن بعدها نجد المجلس العسكري والاخوان المسلمين يسيرون على نفس النهج بشكل متوازي تماما وبرغبات متطابقة تماما .. بداية من نتيجة الاستفتاء ان تكون ( نعم ) ونهاية بعدم انتقاد المجلس إطلاقا من قبل الاخوان .. حتى فيما يخص الاستدعاء للمدنيين امام النيابات العسكرية ؟

هذه فقط بعض ما يدور في رأسي من الاسئلة .. ولكن الاكيد انني لو وجدت إجابات منطقية وحقيقية وواقعية لهذه الاسئلة فسأتمكن من تحديد الموقف بسهولة ... وقتها فقط سأعلم .. هل فعلا المجلس العسكري يحمي الثورة .. أم يحمي شيئا آخر أم اشياء اخرى ؟؟؟

الخميس، 9 يونيو 2011

في حق الشيخ ابي اسحاق الحويني


الدكتورة هبة قطب اتكلمت عن فيديو عامله شاب لطيف وظريف ورخم وجحش عن الشيخ ابي اسحاق الحويني وهو بيقول المرأة غبية والنساء مهما عملوا مقلدات والعلم للرجاله فقط والنساء اغبياء وهلم جر

انا مش هتكلم في ان الكلام ده حصل ولا لا لاني في الاخر هحط لينكات للفيديو الاصلي واللي عايز يفهم هيشوف الفيديو ويفهم مين كلامه صح ومين فاهم غلط ( ده لو عايز يفهم )

لكن انا هتكلم عن نقطه تانية تهمني اكتر وهي ان الاعلام ( الحر ) بيدعي انه محايد وانه بيحترم كل التيارات ومن ضمنها السلفية و و و الى اخره ..... طيب هو الاحترام ده يكون إزاي ... يعني عالم إسلامي زي الشيخ الحويني ممنوع بشكل رسمي وغير رسمي انه يطلع في قنواتكم ( الحرة ) .. طيب خلاص ملكوش دعوة بيه .. يعني يقول سكر يقول ملح يقول اللي هو عايزه صح او غلط خليه في حاله وخليكو في حالكو ... لزومه ايه كل ما شيخ يقول حرف مش على هواكو تجيبولو فيديو وتقولوا اهو بصو شوفو الراجل الوحش بيقول ايه !

ما هو لو هنتعامل بالطريقة دي ممكن ببساطه واحد زيي يحط كل يوم مقطع لواحد مهما كان هو مين ومهما كان انتمائه واطلعه كافر وغبي وجاهل ومتآمر وابن كلب .. الموضوع بسيط يعني ... نتقي الله ونتوخى الحذر والامانه في اللي بنعرضه ونتأكد قبل ما نتكلم

يعني الدكتورة هبة قطب نفسها رغم اني بحترمها لكن ممكن اعملها فيديو متجمع فيه زلات لسان وشوية حاجات متمنتجه واطلعه في الاخر مقطع اباحي واقول اتفضلوا اللي بتتكلم باسم الطب والعلم بتقول ايه !

ده الفيديو اللي الدكتورة تقصده


ودي الدروس الاصليه اللي اتذكر فيها الكلام ده .. نشوف سياق الكلام 


المقطع ده بالذات الشيخ كان بيمدح في امرأة .. يا سبحان الله ..
بل ختم كلامه ان في ستات اغبياء وستات اذكياء وإن الرجاله كمان فيهم اغبياء وفيهم اذكياء


حفظ الله الشيخ الجليل ابي اسحاق الحويني

الأربعاء، 8 يونيو 2011

امين شرطة ده ولا سبايدر مان

امين شرطة خد اعدام عشان قتل 18 متظاهر
وبعدين بعد ما يتعدم ان شاء الله هياخد 25 سنه عشان كان هيقتل اتنين كمان
ويقال انه بعد ما يتعدم ويقضي 25 سنه احتمال ياخد حكم جديد بإنه يتغسل في ميا بملح ويتساب ينشف في الشمس عشان داس على رجل متظاهر...!
وبعدين يرجعوا يقولوا الا النيابه والا القضاء ومحدش يعمل فيها دبوس ويشكشك في القضاء
ويكأن خلاص مفيش غير امين الشرطه اللي قتل المتظاهرين وهيشيل احكام السنين والتنين
طب ال13 ظابط اللي قتلوا المتظاهرين ولسه على ذمة التحقيق وشغالين كمان في اماكنهم دول ايه ظروفهم ان شاء الله
يا نيابة ويا قضاء لحد دلوقتي لسه مفيش دليل واحد مرضي بالنسبه لكم انكم على الاقل على الاقل تخليهم قاعدين في بيوتهم لحد ما يثبت تورطهم او برائتهم ...؟؟؟
لكن يتسابوا في اماكنهم وطبعا يضغطوا على الناس ويبتذوا ناس ويهددوا ناس

لما يطلع خبر في الجرايد ان المهدي المنتظر هيكون من رجال القضاء او النيابة ... ساعتها بس مش هشكك فيهم

الخميس، 2 يونيو 2011

كلمات اروع قصيدة عن الثورة للشاعر تميم البرغوثي ( يا شعب مصر )

يا شعب مصر اللى سابقة ضحكته غضبه
ما يطلع الصبح إلا وصحبتك سببه
يا مخلص الأرض من وحشتها فى الأكوان
يا حجة الشمس تفضل طالعة ساعة كمان
مستأذنة وهى مش عادتها الاستئذان
متونسة بالميدان وبعشرته ونسبه
يا شعب يا مصلي قدام العساكر صف
يجري الجريح من ورا لقدام لا خاف ولا خف
تدوس عليه العربية تحوله لميت الف
يا للعجب يقتلوه ويتوقعوا هربه
يا للعجب يقتلوه ويتوقعوا غيابه
اللي اتقتل لسه واقف هو واصحابه
ما بهدل الامن غير من ماتوا واتصابوا
والصبح ما نور الا اما الشموس غربوا

اضرب عليا انا مش جاري يا قناص
من امتى خوفنا يابن الكلب ضرب رصاص
كل اللي شاف الشهيد بقى تاره تاره الخاص
الدم صاحي وعنيد ولا تقبلوش تربه
يا شعب ياللي دفع تمن الشوارع دم
احفظ اسامي اللي ماتوا في الشوارع صم
الشارع اللي اصطفى وقصر الامارة لم
ملوك قليلة الرباية ركبوا واتركبوا

شعب بغزالة اتخنق قلب التاريخ في يومين
لابس عباية جحا وهو صلاح الدين
بيكرم الانبيا ويهزأ السلاطين
والفجر خيله وحبات الرمال عربه
يا شعب مصر اكم فرعون وفرعونة ضربتهم ضرب سجادة في بلكونة
ضرب الملوك تربية صالحة ومضمونة
ما يبقوا بني ادمين الا اذا اضربوا
ضرب الملوك مصلحة ضرب الملوك تأديب
محلى المماليك وهي بتجري في السراديب
ولولا ضرب شجرة الدر بالقباقيب مابين اغا وباش اغا كان التتار غلبوا
بعدين مبارك سادات فاروق ماحدش دام هو احنا كده ما بيعيشلناش حكام
عقبال جيرانا وحبايبنا كمان يا سلام لو كل من له رئيس نصحى نلاقيه قلبه

يا مصر لسه ولسه الثورة بلة ريق ما ينتهيلك طريق الا ويبدا طريق
يا شعب مصر تعالى نتفق يا شقيق رج الملك قبل ما تنعم عليه بلقبه
رجه كده شوفه ان كان الملك شغال واسأل عليه المكوجي واسأل عليه البقال
واهم حاجة في صفاته انه يكون يتشال متربي عال لما يمشي يلتزم ادبه
بتكون في احسن حالاتك وانت مش محكوم
بتبقى رايق ولا ظالم ولا مظلوم
بعدين ده ايه الغبي ده اللي يهددك بالشوم يا مخلي الف احتلال ينزل على ركبه
يا شعب انت اللي كارم كل من حكمك
الدولة دي عارفة تحكم بس من كرمك
كشر لها وهي حتجيلك تبوس قدمك مافيش حاجة اسمها مليون راجل اتغصبوا

سايق عليك النبي ما تقول كفاية يا شيخ
الملحمة لما تخلص يبدأ التاريخ
وبكرة جاية حروب فيها بكا وصريخ
وبكرة نصرك يخض الشمس من لهبه
سايق عليك النبي ما تقول كفاية كده
من النهاردة انتصاراتك حتبقى كده
يا شعب مصر اللي رجالته وبناته كده
حلال عليه لبن العصفورة لو طلبه
سايق عليك النبي ما تقول كده كفاية
إفرح وكمل وما تقولشى كده كفاية
الثورة دى بداية زى الهجرة والميلاد
الثورة دى بسملة كمل بقى الآية
مع كل مرة قراية حسنها يزداد
والآية تجرى تسلم أختها الراية
من غير نهاية وحتى الوقف مش معتاد
وبكرة أيامنا تبقى حكاية ورواية
عن ناس يباتوا حفايا يصبحوا أسياد
خمسة وعشرين يناير يا شباب حصل ايه
لو قلنا يعنى على الساعة تلاتة الفجر
فى حد فينا طِوِل أو جد حاجة عليه
أو جاب سلاح أو ملايكة بشروه بالنصر
كان اختلف فينا إيه عن أى يوم قبليه
نمنا غلابة، صحينا احنا ولاة الأمر
كان عرش مصر ف أُوَضْنا واحنا ناسيينه
راميين هدومنا على شماله وعلى يمينه
طردنا عنه الحرامى غصب عن عينه
ونزلنا ع الميادين بإدينا شايلينه
بقوا الملوك فى الشوارع والعبيد فى القصر
وف يوم وليلة اكتشفنا ان احنا والنبى مصر
ومصر مش حد تانى غيرنا يعنى يا بيه
وكل واحد سأل طب كنا ساكتين ليه
وشعب مين اللى كانوا الزُّطِّ حاكمينه
بدولة شومة ومختومة بختم النسر
وكل واحد قرا اللى كان على جبينه
رفع بدمه يمينه هْدية وهداية
لو كانت الأنبيا ع المية مَشَّاية
لاجلك يا مصر مشينا باسمين ع الجمر
يا مصر وافتكرى أصل الدنيا نسايه
الملك ده حقنا ومفيش فراعنة جداد
إفرح وكمل وما تقولشى كده كفاية
الثورة دي بداية زى الهجرة والميلاد

مش بس مصر اتغيرت من وقفة الميدان
فيه مساحة ضلمة نورت فى طبيعة الإنسان
فيه حاجة ف طبيعة البشر زى السمع زى البصر
زى اكتشاف القدرة ع الطيران
فيه حاجة كت ضايعة وبانت
خلت الأمة استعانت
عالشقا بالله فهانت
هذه الدنيا على الفتيان
ارقينا وارقيهم يا عم الشيخ
فى حاجة خلت يشمك التاريخ
ينزل عن الوجه الجميل فيبان والخلق كانوا مدركين لكنهم مش كلهم متأكدين
لحظة ما شافوا بعضهم جوة المظاهرةاصبحت واضحة وظاهرة نعمة الرحمن على المستضعفين
وصلت رسالة ربهم من كل زهرة
كل زفرة
كل نفرة
كل زحمة في كل حارة
او خناقة في الاشارة
كل كلمة حق او ضحكة ولد او بنت
كانت دعوة مستورة الى العصيان
فى حاجة أصلا فى الطبيعة تدعو للثورة على السلطان
شوف الشجر رغم الحجر طارح ثمر زى الخبر وبتعلنه الأغصان
شوف الهوا حب اللِّوا فبقوا سوا هبَّة لها ألوان
شوف القمر يفضل قمر تحت الحصار
رغم اقتناعه إنه هايموت قبل ما يشوف النهار
تحصل مفاجأة تطلع الشمس ف حضوره
يختلط نورها بنوره
تشبهه ما تقولش واحدة من ولاده
هى معناه وامتداده
واخدة منه الموهبة والبغددة
وعشان كده
لغة يقولوا عنهم القمران
شوف النجوم ما لهاش نظام حاكم
تكسر كلمة العالم
يبص ويبقى مش فاهم
وهو شايفها ماشية بكيفها فى الأكوان
يا سما هويتك انت بيتي وقلبي بيتك تشبهيني واشبهك بالمعنيين
الشبهة يعني والشبه يام النجوم الفلتانين
وباموت انا في فلتانك الامني لإنه عبقري وفني
وفيه منطق من الموجود في كل جنان وبرضه باحبه بس كده عشان فلتان
فيه حاجة غامضة بتكتشف
هى اللى بتخلى الحصان اللى اتحدف
من بطن أمه ولسه مش عارف يقف
يقزح ويجرى ويعرف انه حصان
فيه حاجة بتخلى السجين المستكين فى كل حين اشطر من السجان
فيه حاجة بتخلى القوى عيِّل قوى وبيتلوى من نكتة الغلبان
فيه حاجة بتخلى عيون الخلق ما تنامشى
وبتخلى المدن تمشى
وتخرج زى كلمة حق من غير قصد مابترجعش لو طلعت
وم الأسمنت والأسفلت يفلت فلت نهر مقدس الجريان
فليحذر السلطانُ زحف الغابة
والورد إذ يستأنس الدبابة
داب الحديد من لمسته دوبان
فيه حاجة خلت خطة الموت ترتبك
عابس وعايز يشتبك
خاف من ضحية جاية ناوية تاخده بالأحضان
وإذا بهذا الفجر يا اخواننا اتولد بيننا
وكنا احنا بنستنى وهو كمان بيستنا
واتاريه بس عايز إذن منا وهو فى يميننا
فلما أذنا خد منا وعطانا أمان
يا فجر يا سابق صياح الديك
يا شعب يا مشبك إيديك فى إديك
وكأنها خط الثلث فى آية القرآن
إديت لآدم معنى تانى زاد على كل المعانى
وربنا قال هو ده قصدى وده غرضى
كده بالظبط لا زيادة ولا نقصان

يا مصر وانت لسه في البدايات بكرة اللي جاي اعظم م اللي فات
يا مصر قومي وبصي في المرايات
كان كل واحد في الميدان جايب معاه مراية
رافعها للسما اشكال والوان كلها مرفوعة في العالي
صبحت مراية واحدة بتلالي
وبقت يا مصر الارض صورة للسما
لعبة بازل متكاسرة الاجزاء لما البشر يتجمعوا تبان السما ع الارض
واما البشر يتفرقوا تلقي السما بتنفض
تبقى سما متوزعة جوه الشقق وتمر ليلة من التوجس والقلق
وننام ونصحى تاني يوم ترجع سما لما البشر يتجمعوا مع بعض
يا مصر حقك تملكي بدل السما اتنين
واحدة هدية وواحدة تانية صانعها مصريين
يا مصر لو دققتي حتلاقي البراق بيجر عربية فواكه في الحواري الضيقة
شوفي الصحابة والحواريين على القهوة بيتناقشوا بحرارة والسما على مد ايدهم مستشارة طيعة ورقيقة
شوفي المساجد كت تشاور ع السما صبحت تشاور ع البشر وتقول اهما يا سما بصي وشوفي وابقي قول لكل صوفي وهو طالع لك طريق المعرفة اتغير يوصل م السما للارض لا يتوه ولا يحير
وشوفي الخلق وسط الموت تقابله وهي بتهزر فيتلخبط ويتبعتر وسر الدنيا يتفسر ونعدلها ونوزنها

باقول يا مصر قومي وبصي في المرايات في سما الولاد هم اللي عاملينها
بيشوفوا بعض في وش بعض كأن انا انت وهو انا واحنا الكل
احنا ف مرايا بعض بنصبح صباح الفل
افدي بروحي كل واحد في المرايا طل
افدي الشهيد اللي بيتبسم الفجر توب على قده متكسم والله اعلم مين من الاتنين في صاحبه حل
افدي اللي سهران ع الخيم في الطل
وافدي اللي واقف يشتغل في الضل
وافدي اللي شايل للعناد اشارات يهدي التاريخ صوب الميدان لو ضل
وافدي اللي واقف هاري نفسه كلام
وافدي اللي يتريق على الحكام
وافدي اللي رايح جاي ما بيتعبش
وافدي اللي جنبه حط فرشة ونام
وافدي طويل البال ما يتعصبش
وافدي المصاب اللي شوية وطاب
وافدي المصاب بهوى التراب وما طابش
وافدي اللي صاب البلطجي وما اتصابش
وافدي المقام العالي في التحرير دولة بلا امرا وشعب امير

اعلم يا هذا الجيل ان الوطن بشره لو مصر مالهاش نيل كان شعبها حفره
مش وصلوا بحرين وبنوا جبال اتنين
وف ظرف أسبوعين على خوفهم انتصروا
والخوف ده شىء معروف بيفرعن الحلوف
رزق الملوك الخوف من غيره يندثروا
رزق الملوك بقشيش من خوفنا شعب وجيش
ومفيش ملك بيعيش لو شعبك افتكره
ناس لسة فى العشرين نازلين على الميادين
بيهزأوا السلاطين من غير ما يعتذروا يا شعب يا مجنون علم شعوب الكون اللي اخترع فرعون قادر يجيب خبره
يا سادة الايام يا رافعين الهام
من بكرة بر الشام نادر لكم شجره
نادرها تين وزتون فى القدس ينتظرون
جيش ع الغلابة حنون وعلى العدى ضرره
دافعين تمنها دما يا امة الكرما شعبك كأنه سما والدنيا دي مطره
يا مصر حمد الله ع السلامة
مطر ونازل بدون غمامة
مطر يا سيدي نازل وطالع كأنه مدنا والارض جامع والارض دي مظاهرة في الشوارع تسقي السما جدعنة وشهامة
مطر وطالع يقول لربه الامهات اللي في مصر ربوا
ويا بنات مصر قوموا حبوا اجمل ما في الراجل الكرامة
مطر وطالع ع الفجر يدن طلعت بنات مصر حلوة جدا
في الحرب والدنيا نار ومعدن طايرة وشايلة السما اليمامة
خمسة وعشرين من شهر واحد الفين وعشرة وزادوا واحد كنا ملايين وكنا واحد حددنا موعد يوم القيامة
قلت لصحابى انزلوا وانا بعيد عنهم
وقلت من بات فى بيته سلم اصحابه
وانا اللى غبت وهمه اللى هنا اتصابوا
نزلوا الشباب الميدان وانا بعيد عنهم
كسروا الشباب البيبان وانا بعيد عنهم
خرج الشباب م البيوت وأنا بعيد عنهم
دخل الشباب فى الموت وانا بعيد عنهم
يا موتى قوم امتحنى أعتذر منهم
اشمعنى يا كلب تستثنينى من بينهم
يوم الخطر قبلها ما كنت اجبنهم
يا موت تعالى اعوض غربتى ومنفاى
يا موت تعالى أحاسبك ع القديم والجاى
يا موت تعالى ونتقاسمك أنا وعداى
ولا تطال عزوتى وانا بعيد عنهم
بس الحكومة قالت لي انت مش مصري
انت فلسطيني يعني اجنبي حصري
طيب يا بيه يعني بلاد الشام بلاد اروام؟
اعيد كلام قلته ميت مرة ده يبقى كلام؟
مش ام هاشم بلدها السيدة زينب؟
مش الحسين في الحسين ولا لازم له جواز؟
ولا حيختار مابين مصر وعراق وحجاز؟
والمرسي والشاطبي جم م الاندلس الاتنين من مرسية وشاطبة لو كانوا مش باينين
في اسكندرية اجانب ولا مصريين
اسماءنا هي بلادنا يا حسن يا حسين
اسماءنا زي العلم زي اللغة والدين
اسماءنا هي الوطن له دمنا لو عاز
واسمي خلالي في الارض العريضة ملاذ
وعزوة في كل دار تنطق حروفه تمام وف كل دار ليا صحبة وليا اهل عزاز
كان نفسي يا مصر يتأكد كلامي بدم والدم يا مصر برضه ع المحبة قليل
قالوا لي بتحب مصر قلت مش عارف
هو الهوى يبقى جارف لما اقول جارف؟
واقعد أألف أغاني عن جمال النيل
وحكاية الشرب ميت مرة وهرم ونخيل
ولا الهوى الحق هو اللي يهد الحيل
واولى شيء في الهوى يا مصر شيل الهم ياللي تحب النبي ايدك معانا وشيل
الحب اتقل من اسمه واسمه نفسه تقيل
وفي التباس المحبة ع المحبة دليل
ما تعرف اللي اصابك عشق ولا تعب والشوق بيقلب مع الحرمان ساعات بغضب والصبر بس اما يخلص يبقى صبر جميل

يا اهل مصر وانا اهلي في مصر عرب اهلي عزازمة وعشايرة الخال وخال الخال ما بين شراقوة وصعايدة بدو في الحالتين
قولوا لي دولا عرب او دولا مصريين او دولا الاتنين سوا في الحل والترحال
بعدين انا اسمي تميم وحاروح من اسمي فين؟
مش فيه في مصر قريش؟
قالوا البراغتة قريش من بيت عدي بن مرة والنسب عمري حطوا الحدود والعشيرة واحدة في البلدين
وسلك شائك فرق من قالوا ليه او ليش وكنت اطنش لو ان البحث ده نظري لكن ده فيه دم سال واسأل رفح وعريش واسأل ملوك ترهن الاقصى برغيف العيش واسأل حدود تحرم المسلم من الحرمين
واسأل في غزة الوف في الحرب متحاصرين ويخيروني العيال في حب اب وام
انا ابن رضوى ومريداسمي تميم من تم
وكل دار للعرب لي فيها خال او عم
واللي يقول غير كده بيني وبينه الدم
مين اللي يثبت ومين يجري يلم الديل

شد الكلام عمته واختار اعز جواد
ورد قاصد بلاده والهوى رداد
وابن الاصول اللي ما يبدل ببلاد ببلاد
والغربة مرة ولو كانت هدومها جداد
في مصر بعد السفر وجد الكلام معناه
واهل مصر صحابي واولياء الله
يا اوليا لسه في العشرين وفي التلاتين
يستنجدوا المؤمنين في المأزمة بيكم يا فارجين الكرب بين العرب عناوين
منعني عنهم مطار القاهرة واسمي
واني لو جيت يقولوا اجنبي مسكناه
مسكنا واحد اهو له مديح في حزب الله
يتهموا اصحابي بيا مش انا بيهم
واضرلي ستة سبعة اكون في وسطيهم
ع بال ما خلص الكلام ده النصر كان مضمون
القلب فرحان ولكن اتعبه منفاه
وهده بعده عن اللي عاش بيستناه ما فضلش غير انحني حبا واقول الله
الله افردني عنهم وجمعهم
لكي اراهم على بعد واسمعهم
قد فاز فوزا عظيما من قضى معهم

لما تشوف الشهيد تبقى السلامة خجل
وتبقى عايز تقول له يا أخى آسف
طب قول لى بس اعمل ايه، لو يعنى فيها عمل
اللقمة دى لك نصيب فيها باشيلهولك
واشيل نصيبك من القاعدة وكاسات الشاى
لكن نصيبك فى أنفاسى أشيله إزاى
وازاى أشيللك نصيبك من فرحنا الجاى
ساعات ألاقينى باطلب خط محمولك
بعمل فى نفسى كده ليه، لسه مش عارف
وروح على القهوة أسأل، هو جه وسأل
من قال لك الموت طبيعى يبقى مش شايف
الموت ده شىء مش طبيعى الموت ده أصله خلل
الأصل فينا الخلود وهييجى يوم نلقاه
ما تحسبوش الشهيد اداكوا بس حياة
ما موتوش هو وحده اللى برصاصة رماه
ده طخ ابنه اللى ل
سه ما اتولدش معاه
وطخ أولاد ولاده لآخر الأيام
موت معاه بشرية كاملة محتملة
عدوا بقى فيها كام شاعر وكام رسام
وكام طبيب عبقرى بين الأطبة إمام
وفيلسوف له على حكم الليالى كلام
وبنت نظرتها تشفى القلب من داؤه
فى شعب كامل رحل ما عرفش أسماؤه
فيجسم كل شهيد فيه مصر مكتملة
فخلوا مصر اللى فاضلة تعيش كما شاؤوا

رمضان كريم والمسامح كريم

بيقولك اونكل حسني هيبدأو يحاكموه في 3 اغسطس
كام واحد يعني يهمهم حسني يتحاكم وعاملين فيها السبع رجاله
نقول 70 مليون مثلا
اهو 20 مليون منهم يتشغلوا بالياميش والفاميش والارائيش و20 مليون كمان يتشغلوا بالمسلسلات والبرامج اياها و20 مليون يسامحوا حسني وخلاص في ليلة القدر
هيتبقى كام 10 مليون .. دول مش مشكلة اهم يعملوا ونس برضه

طيب لما نشوف دي كمان هتنفع ولا لا
هنشوف توقعكوا هيطلع صح ولا الشعب هيطلع برضه ابن كلب رخم ومش هينسى ان حسني لازم ياخد نصيبه على قفاه بما ير
ضي الله